1:1 On ma surat partuturan ni Jesus Kristus, anak ni si Daud, anak ni si Abraham.

1:2 Anak ni si Abraham si Isak, anak ni si Isak si Jakob, anak ni si Jakob si Juda ampa saninani ai.

1:3 Anak ni si Juda si Peres pakon si Sera, humbani si Tamar; anak ni si Peres si Esrom, anak ni si Esrom si Aram.

1:4 Anak ni si Aram si Aminadab, anak ni si Aminadab si Nahason, anak ni si Nahason si Salmon.

1:5 Anak ni si Salmon si Boas humbani si Rahab, anak ni si Boas si Obed humbani si Rut, anak ni si Obed si Jesse.

1:6 Anak ni si Jesse Raja Daud, anak ni si Daud si Salomo, humbani binuat ni si Uria.

1:7 Anak ni si Salomo si Rehabeam, anak ni si Rehabeam si Abia, anak ni si Abia si Asa.

1:8 Anak ni si Asa si Josapat, anak ni si Josapat si Joram, anak ni si Joram si Usia.

1:9 Anak ni si Usia si Jotam, anak ni si Jotam si Ahas, anak ni si Ahas si Hiskia.

1:10 Anak ni si Hiskia si Manasse, anak ni si Manasse si Amon, anak ni si Amon si Josia.

1:11 Anak ni si Josia si Jekonya ampa sanina ai, ai ma bani panorang habuangan hu Babel.

1:12 Jadi dob tarbuang sidea, tubuh ma si Sealtiel, anak ni si Jekonya, dob ai si Serubabel, anak ni si Sealtiel.

1:13 Anak ni si Serubabel si Abiud, anak ni si Abiud si Eliakim, anak ni si Eliakim si Asor.

1:14 Anak ni si Asor si Sadok, anak ni si Sadok si Akim, anak ni si Akim si Eliud.

1:15 Anak ni si Eliud si Eleasar; anak ni si Eleasar si Mattam, anak ni si Mattam si Jakob.

1:16 Anak ni si Jakob si Josep, paramangon ni si Maria, na manubuhkon Jesus, na margoran Kristus.

1:17 Ase buei ni sundut humbani si Abraham das hubani si Daud ai ma sapuluh ompat sundut, anjaha humbani si Daud das hu habuangan Babel sapuluh ompat sundut, anjaha humbani habuangan Babel das hubani Kristus sapuluh ompat sundut.

1:18 Ia partubuh ni Jesus Kristus, sonon do: Sanggah tunangan ni si Josep ope inangni, si Maria ai, boratan rumah do ia humbani Tonduy Na Pansing, sanggah lape marsidohoran sidea.

1:19 Ia si Josep, paramangonni ai, paruhur na pintor do, anjaha seng sihol uhurni laho pabadorhonsi, gabe tubuh ma uhurni manirangkonsi sip-sip.

1:20 Tapi sanggah sonai ope sura-sura ni uhurni, ididah ma ibagas nipini malekat ni Tuhan in, na mangkatahon hu bani, “O Josep, anak ni si Daud, ulang ma mabiar ho mangalop si Maria gabe parinangonmu, ai na adong bani ai, ai ma na humbani Tonduy Na Pansing.

1:21 Tubuhan Anak ma ia, anjaha bahen ma goran-Ni Jesus, ai paluahon-Ni do bangsa-Ni humbani dousa ni sidea.

1:22 Masa pe haganupan ai, ase jumpah do na hinatahon ni Tuhan in marhitei nabi-Ni, na mangkatahon,

1:23 ʻTonggor ma, boratan rumah ma sada anak boru, anjaha tubuhan anak, anjaha bahenonni ma goranni Immanuel, artini: Hasomanta do Naibata.ʼ”

1:24 Jadi dob puho si Josep, idalankon ma songon na hinatahon ni malekat ai bani, saud ma ialop parinangonni ai.

1:25 Tapi seng idohori ia, paima tubuh anak bunga tubuhni ai, anjaha igoran ma Ia Jesus.