1:1 Ri raya buku si’i ratulis mangkonong potapi mbiyaa i Yesu Kerisitu. Ia wiyaa nu bue ngkita i Makole Daud pasi wiyaa i Abraham seja.

1:2 Wali ewa si’i potapi mbiyaa i Yesu yako i Abraham rataka i Makole Daud tempo owi. Wali i Ishak ia ana i Abraham, Yakub ia ana i Ishak, pei Yehuda pasi pua’inya sira ana i Yakub.

1:3 Peres sira dua i Serah sira ana i Yehuda sira dua i Tamar. Hesron ia ana i Peres, Ram ia ana i Hesron,

1:4 Aminadab ia ana i Ram, Nahason ia ana i Aminadab, Salmon ia ana i Nahason,

1:5 Boas ia ana i Salmon sira dua i Rakhab, Obed ia ana i Boas sira dua i Rut, panewa Isai ia ana i Obed.

1:6 Pasi ewa si’i wo’u potapi mbiyaa i Yesu yako i Makole Daud rataka temponya to Israel rakeni yau njo’u Babel. Wali i Makole Daud ia ana i Isai, Salomo ia ana i Makole Daud sira dua to we’a to balu i Uria,

1:7 Rehabeam ia ana i Salomo, Abia ia ana i Rehabeam, Asa ia ana i Abia,

1:8 Yosafat ia ana i Asa, Yoram ia ana i Yosafat, Uzia ia ana i Yoram,

1:9 Yotam ia ana i Uzia, Akhas ia ana i Yotam, Hiskia ia ana i Akhas,

1:10 Manase ia ana i Hiskia, Amon ia ana i Manase, Yosia ia ana i Amon,

1:11 Yekhonya pasi a’i-a’inya sira ana i Yosia. (Yekhonya rapoanaka ri tempo to Israel rakeni yau njo’u Babel darata’amaka nja’u ria).

1:12 Wali yako etu, room to Israel rakeni yau etu rataka tempo pampoana i ngKerisitu, ewa si’i potapi mbiyaaNya. Wali i Sealtiel ia ana i Yekhonya, Serubabel ia ana i Sealtiel,

1:13 Abihud ia ana i Serubabel, i Elyakim ia ana i Abihud, Azor ia ana i Elyakim,

1:14 Sadok ia ana i Azor, Akhim ia ana i Sadok, Eliud ia ana i Akhim,

1:15 Eleasar ia ana i Eliud, Matan ia ana i Eleasar, Yakub ia ana i Matan,

1:16 pasi Yusup ia ana i Yakub. Wali i Yusup etu, ia semo rongo i Maria. Wali i Maria ia semo to mampoanaka i Yesu anu to rato’oka i Kerisitu, Makole parajanji i mPue Allah.

1:17 Wali yako resi i Abraham rataka ri tempo i Makole Daud sampuyu pei opo ntapi wiyaanya. Pasi yako i Makole Daud rataka ri tempo to Israel rakeni yau njo’u Babel sampuyu pei opo ntapi seja wiyaanya. Pasi yako ri tempo sira rakeni yau etu rataka ri tempo i Kerisitu, Makole parajanji i mPue Allah rapoanaka sampuyu pei opo ntapi seja wiyaanya.

1:18 Wali ewa si’i to mawali tempo pampoana i Yesu Kerisitu. Tempo etu i Maria, indoNya etu, ia owo mawali kasimpande i Yusup. Sira dua tawa maroo siwaka, pei tempo etu semo i Maria mayu’umo, mangkayu’uka kuasa i Nosa Mapasing.

1:19 Wali kasimpandenya, i Yusup, ia tau to lengkonya singkonong pei i Pue Allah. Wali tempo ia mangansani i Maria mayu’umo, ia rani mampoga’aka kasimpandenya etu. Pei ia mangaliwu jaya mampoga’aka i Maria see taa boros tau to mangansani, apa ia taa rani i Maria mangarata ea ri tango ntau boros.

1:20 Pei tongo-tongonya ia mampobuu-buuka etu, ia yore yau pei mangipi. Ri raya mpangipinya etu ia mangkita samba’a pomakau i mPue Allah yako ndate saruga rata resi ia. Pomakau etu mampogomboka ia manganto’o, “O Yusup, wiyaa i Daud, ne’e bata-bata rayamu mamporongo i Maria. Apa Ana ri raya ngkomponya etu mawali yako ri kuasa i Nosa Mapasing.

1:21 Wali i Maria damampoanaka ana langkai panewa korom damangansangaka Ia i Yesu, apa Ia semo damampalaes tauNya yako ri huku nu dosa nsira.” Etu semo gombo mpomakau i mPue Allah resi i Yusup.

1:22 Wali ewa wetu palaong to nawali resi i Maria sira dua i Yusup ri tempo etu. Naka pei samparia palaong etu nawali see tibanang gombo i mPue to naporata nto pantuntu tuntuNya tempo owi.

1:23 Gombo i mPue etu manganto’o, “Padongeka kojo gombongKu si’i. Dare’e samba’a tau we’a to tawa re’e nepenya to langkai. Tau we’a etu damayu’u pasi damampoanaka ana langkai. Panewa ana etu darato’oka ‘Imanuel’.” (Wali batuanginya Imanuel etu semo i Pue Allah re’e siwaka pei kita.)

1:24 Wali ojo karoonya pomakau etu magombo, i Yusup mambangu pei mangaluluka porenta mpomakau i mPue Allah etu. Wali ia mangoko i Maria mawali rongonya.

1:25 Pei ri katawanya i Maria mampoanaka ana langkai etu i Yusup tawa re’e mangamporouka ia. Wali yako etu, ojo pampoanaka ana etu i Yusup mangansangaka Ia i Yesu.