1:1 Ini e kai rol᷊ẹ̌ u manga i upung gaghurangu Mawu Yesus Kristus, hěnton Daud, hěntong Abraham. Bọ'i Abraham sarang i Daud, manga areng i upungu Mawu Yesus kai kere ini:

1:2 Abraham, Ishak, Yakub, Yehuda ringangu manga anạ u sěmbaụe, i Peres dingang i Zerah (i ninang i sire isẹ̌sẹ̌ba si Tamar), Hezron, Ram, Aminadab, Nahason, Salmon, Boas (i ninange i Rahab), Obed (i ninange i Rutẹ̌), Isai, dingangu Ratu i Daud.

1:3 (1:2)

1:4 (1:2)

1:5 (1:2)

1:6 Bọu i Daud sarang tempone tau Israel niwembang sarang Babel, mạbawohẹ manga areng ini: Salomo (i ninange kai wal᷊ung Uria), Rehabeam, Abia, Asa, Yosafat, Yoram, Uzia, Yotam, Ahas, Hizkia, Manasye, Amon, Yosia, Yekhonya dingangu manga anạ u sěngkataune.

1:7 (1:6)

1:8 (1:6)

1:9 (1:6)

1:10 (1:6)

1:11 (1:6)

1:12 Bọu tempon tau Israel niwembang su Babel sarạeng kawawantel'u Mawu Yesus mạbawohẹ manga areng ini: Yekhonya, Sealtiel, Zerubabel, Abihud, Elyakim, Azur, Zadok, Akhim, Eliud, Eleazar, Matan, Yakub, Yusup kawing i Maria. Kụ bọu i Maria ene nawantel'e Mawu Yesus kụ isẹ̌sẹ̌bạ si Kristus.

1:13 (1:12)

1:14 (1:12)

1:15 (1:12)

1:16 (1:12)

1:17 Kụ bọu i Abraham sarang i Daud kal᷊awọe mapul᷊o -- epạ su hawenge. Bọu i Daud sarang tau Israel niwembang su Babel ute mal᷊aing mapul᷊o -- epạ su hawenge. Bọu tempon tau Israel niwembang su Babel sarang kal᷊aiwantel'u Mawu Yesus Kristus mal᷊aing mapul᷊o -- epạ su hawenge.

1:18 Kere ini wẹ̌keng kal᷊aiwantel'u Mawu Yesus Kristus. I ninange i Maria e měkẹ̌kakaghiang dingang i Yusup. Arawe i rẹ̌dua reng tawe někẹ̌kawing, kutẹu nạung i Maria kai seng piạ kapapia. I Yusup bẹ̌daweng bẹ̌ga u kapapia ene kai ual᷊ingu kawasang Rohkẹ̌ u Ruata.

1:19 I Yusup kaghiange ene kai sěngkatau masatia tutuhụ titang agama. Kutẹu i sie měkẹ̌karaki maměsụ pẹ̌kakaghiange su kapapěnisẹ̌, tadeạu i Maria tawe mamea su těngong l᷊awọ.

1:20 Tangu piạ e i Yusup mělẹ̌hingidẹ̌ hal᷊ẹ̌ ene, i sie nipi. Su ral᷊ungu ipine ene, i sie nakasilo sěngkatau malạekat'u Mawu kụ nẹ̌berạe si sie, "Yusup, hěnton Daud, abe katakụ mẹ̌kawing i Maria; batụ u anạ kụ su ral᷊ungu gandongange kai pinẹ̌pohiama ual᷊ingu kawasang Rohkẹ̌ u Ruata.

1:21 I Maria sarung maiwantel'u sěngkatau ahusẹ̌ esẹ. Dariọ ene mambeng sěbạu arenge i Yesus, u kai i Sie sarung mangambang umat'E wọu rosan sire."

1:22 Patikụ ene nariadi kerene, tadeạu misěhụ apan nihengetangu Mawu limiu nabin'E, angkuěng,

1:23 "Sěngkatau mahuala sahị sarung piạ kapapia ringangu maiwantel'u sěngkatau ahusẹ̌ esẹ. Ahusẹ̌ ene sarung isẹ̌ba Imanuel." (Imanuel su werang Ibrani mangal᷊ene ute, "Mawu Ruata e ene ringang i kitẹ".)

1:24 Sarạeng i Yusup napukọe, i sie nẹ̌koạe kěbị apan niwerang malạekat'u Mawu e si sie. I sie nẹ̌kawing dingang'i Maria.

1:25 Kụ karěngụewen i Maria reng tawe nạmantel'u ahusẹ̌ ene, i rẹ̌dua e reng tawe nẹ̌tẹ̌tatamba nakoạ gẹ̌si sěmbaụ. Kụ sarạeng ahusẹ̌ ene nawantelẹ̌. I Sie nisẹ̌bạ i Yusup si Yesus.